ਕਰੋ ਪਤਾ ਕਿਸਨੂੰ ਸ਼ਿਕਾਰ ਬਣਾਉਣ ਨਿਕਲਿਆ ਸੀ ਸੁਖਦੇਵ, ਪੁਲਿਸ ਨੇ 6 ਗੋਲੀਆਂ ਨਾਲ ਕੀਤਾ ਢੇਰ

Reporter 12
14 Dec, 2023 03:01

ਕਰੋ ਪਤਾ ਕਿਸਨੂੰ ਸ਼ਿਕਾਰ ਬਣਾਉਣ ਨਿਕਲਿਆ ਸੀ ਸੁਖਦੇਵ, ਪੁਲਿਸ ਨੇ 6 ਗੋਲੀਆਂ ਨਾਲ ਕੀਤਾ ਢੇਰ

ਲੁਧਿਆਣਾ (ਪੰਜਾਬ)14/12/23

25 ਤੋਂ ਵੱਧ ਮਾਮਲਿਆਂ ਵਿੱਚ ਲੋੜੀਂਦਾ ਗੈਂਗਸਟਰ ਸੁਖਦੇਵ ਉਰਫ ਵਿੱਕੀ ਬੀਤੀ ਰਾਤ ਲੁਧਿਆਣਾ 'ਚ ਪੁਲਿਸ ਨਾਲ ਹੋਈ ਮੁੱਠਭੇੜ ਦੇ ਵਿੱਚ ਮਾਰਿਆ ਗਿਆ। ਗੈਂਗਸਟਰ ਨੂੰ ਕਰੀਬ 6 ਗੋਲੀਆਂ ਲੱਗੀਆਂ।ਇਹ ਬਦਮਾਸ਼ ਵਾਰਦਾਤ ਨੂੰ ਅੰਜਾਮ ਦੇਣ ਲਈ ਬੀਤੀ ਸ਼ਾਮ ਭੈਣੀ ਸਾਹਿਬ ਦੇ ਰਸਤੇ ਤੋਂ ਨਿਕਲਿਆ ਸੀ। CIA-2 ਦੇ ਇੰਚਾਰਜ ਬੇਅੰਤ ਜੁਨੇਜਾ ਨੂੰ ਸੂਚਨਾ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਭੈਣੀ ਸਾਹਿਬ ਅਤੇ ਆਸ-ਪਾਸ ਦੇ ਪਿੰਡਾਂ 'ਚ ਗਸ਼ਤ ਕਰਨੀ ਸ਼ੁਰੂ ਕਰ ਦਿੱਤੀ । ਉਹ 8 ਦਸੰਬਰ ਤੋਂ ਲਗਾਤਾਰ ਵਾਰਦਾਤਾਂ ਕਰ ਰਿਹਾ ਸੀ। ਸੁਖਦੇਵ ਆਪਣੇ ਸਾਥੀਆਂ ਨਾਲ ਮਿਲ ਕੇ ਬੰਦੂਕ ਦੀ ਨੋਕ ‘ਤੇ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦਿੰਦਾ ਸੀ। ਗੈਂਗਸਟਰ ਸੁਖਦੇਵ 25 ਤੋਂ ਵੱਧ ਮਾਮਲਿਆਂ ਵਿੱਚ ਲੋੜੀਂਦਾ ਸੀ।ਪੁਲਿਸ ਨੇ ਕਰੀਬ 10 ਕਿਲੋਮੀਟਰ ਤੱਕ ਬਦਮਾਸ਼ ਦਾ ਪਿੱਛਾ ਕੀਤਾ। ਸੁਖਦੇਵ ਇੰਨਾ ਚਲਾਕ ਸੀ ਕਿ ਉਸਨੇ ਮੋਟਰ ਸਾਈਕਲ ਪਿੰਡ ਦੇ ਸੂਏ ਵੱਲ ਨੂੰ ਭਜਾ ਕੇ ਲੈ ਗਿਆ। ਅਖੀਰ ਪੁਲਿਸ ਨੇ ਪਿੰਡ ਪੰਜੇਟਾ ਕੋਹਾੜਾ-ਮਾਛੀਵਾੜਾ ਰੋਡ ’ਤੇ ਜਾਲ ਵਿਛਾ ਦਿੱਤਾ। ਜਦੋਂ ਬਦਮਾਸ਼ ਨੂੰ ਬਾਈਕ 'ਤੇ ਆਉਂਦਾ ਦੇਖਿਆ ਤਾਂ ਉਸ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ।

ਪੁਲਿਸ ਦਾ ਦਾਅਵਾ ਹੈ ਕਿ ਸੁਖਦੇਵ ਨੇ ਇੰਸਪੈਕਟਰ ਬੇਅੰਤ ਜੁਨੇਜਾ ਦੀ ਗੱਲ ਸੁਣੇ ਬਿਨਾਂ ਹੀ ਗੋਲੀ ਚਲਾ ਦਿੱਤੀ। ਬੇਅੰਤ ਨੇ ਬੁਲੇਟ ਪਰੂਫ ਜੈਕੇਟ ਪਾਈ ਹੋਈ ਸੀ, ਜਿਸ ਕਾਰਨ ਉਸ ਦਾ ਬਚਾਅ ਹੋ ਗਿਆ। ਇੰਸਪੈਕਟਰ ਨੂੰ ਗੋਲੀ ਮਾਰਨ ਤੋਂ ਬਾਅਦ ਬਾਕੀ ਪੁਲਿਸ ਮੁਲਾਜ਼ਮਾਂ ਨੇ ਵੀ ਬਦਮਾਸ਼ 'ਤੇ ਗੋਲੀਆਂ ਚਲਾ ਦਿੱਤੀਆਂ। ਆਪਣੀ ਜਾਨ ਬਚਾਉਣ ਲਈ ਗੈਂਗਸਟਰ ਸੁਖਦੇਵ ਬਾਈਕ ਤੋਂ ਹੇਠਾਂ ਉਤਰ ਗਿਆ ਅਤੇ ਸੂਏ ਨੇੜੇ ਲੁੱਕ ਗਿਆ ਅਤੇ ਫਾਇਰਿੰਗ ਸ਼ੁਰੂ ਕਰ ਦਿੱਤੀ। ਮੁਕਾਬਲੇ ਵਿੱਚ ਏਐਸਆਈ ਦਲਜੀਤ ਸਿੰਘ ਦੇ ਪੱਟ ਵਿੱਚ ਗੋਲੀ ਲੱਗੀ ਹੈ।ਦੋਵਾਂ ਪਾਸਿਆਂ ਤੋਂ 18 ਤੋਂ 20 ਗੋਲੀਆਂ ਚਲਾਈਆਂ ਗਈਆਂ। ਸੂਤਰਾਂ ਮੁਤਾਬਕ ਬਦਮਾਸ਼ ਨੇ 5 ਤੋਂ 6 ਗੋਲੀਆਂ ਚਲਾਈਆਂ ਹਨ। ਪੁਲਿਸ ਅਤੇ ਗੈਂਗਸਟਰ ਵਿਚਾਲੇ ਗੋਲੀਬਾਰੀ ਕਰੀਬ 2 ਮਿੰਟ ਤੱਕ ਚੱਲੀ। ਅਪਰਾਧੀ ਸੁਖਦੇਵ ਨੂੰ ਪੁਲਿਸ ਨੇ 2 ਮਿੰਟ ਦੇ ਅੰਦਰ ਹੀ ਮਾਰ ਦਿੱਤਾ ਸੀ। ਗੋਲੀਆਂ ਚੱਲਣ ਕਾਰਨ ਪੂਰੇ ਇਲਾਕੇ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ ਸੀ।ਭਾਵੇਂ ਗੈਂਗਸਟਰ ਸੁਖਦੇਵ ਵਿੱਕੀ ਪਿਛਲੇ 14 ਦਿਨਾਂ ਤੋਂ ਅਪਰਾਧਾਂ ਨੂੰ ਅੰਜਾਮ ਦੇ ਰਿਹਾ ਹੈ ਪਰ ਪੁਲਿਸ ਨੂੰ ਹੁਣ ਤੱਕ 8 ਦਸੰਬਰ ਤੋਂ ਉਸ ਦੇ ਜੁਰਮਾਂ ਦਾ ਰਿਕਾਰਡ ਹਾਸਲ ਹੋਇਆ ਹੈ। ਪੁਲਿਸ ਨੇ ਸੁਖਦੇਵ ਦੇ ਤਿੰਨ ਸਾਥੀਆਂ ਆਰੀਅਨ ਸਿੰਘ ਉਰਫ਼ ਰਾਜਾ, ਸੁਨੀਲ ਅਤੇ ਬਲਵਿੰਦਰ ਉਰਫ਼ ਬੌਬੀ ਨੂੰ ਪਹਿਲਾਂ ਹੀ ਗ੍ਰਿਫ਼ਤਾਰ ਕਰ ਲਿਆ ਸੀ। ਸਾਰੇ ਬਦਮਾਸ਼ ਨਸ਼ੇ ਦੀ ਪੂਰਤੀ ਲਈ ਲੋਕਾਂ ਨੂੰ ਲੁੱਟਦੇ ਸਨ। ਕੋਈ ਵਿਅਕਤੀ ਵਿਸ਼ੇਸ਼ ਨਹੀਂ ਬਲਕਿ ਹਰ ਦੁਕਾਨਦਾਰ ਅਤੇ ਰਾਹਗੀਰ ਇਨ੍ਹਾਂ ਦਾ ਸ਼ਿਕਾਰ ਹੋਏ।

ਪੁਲਿਸ ਨੇ ਮ੍ਰਿਤਕ ਗੈਂਗਸਟਰ ਸੁਖਦੇਵ ਉਰਫ ਵਿੱਕੀ ਕੋਲੋਂ 1 ਪਿਸਤੌਲ 32 ਬੋਰ, 1 ਪਿਸਤੌਲ 32 ਬੋਰ, 2 ਰੌਂਦ 32 ਬੋਰ, 1 ਲਾਈਟਰ, 1 ਖੋਹੀ ਹੋਈ ਅਪਾਚੇ ਬਾਈਕ, 1 ਪਲਸਰ ਬਾਈਕ, ਅਤੇ 1 ਦਿਨ ਪਹਿਲਾਂ ਫੜੇ ਗਏ ਸਾਥੀਆਂ ਕੋਲੋਂ 1 ਸਪਲੈਂਡਰ ਬਾਈਕ ਬਰਾਮਦ ਕੀਤੀ ਹੈ। ਸੂਤਰਾਂ ਅਨੁਸਾਰ ਪਤਾ ਲੱਗਾ ਹੈ ਕਿ ਆਰੀਅਨ ਸਿੰਘ ਉਰਫ ਰਾਜਾ ਅਤੇ ਸੁਨੀਲ ਦੋਵੇਂ ਗੋਰਖਪੁਰ ਦੇ ਰਹਿਣ ਵਾਲੇ ਹਨ। ਰਾਜਾ ਅਤੇ ਸੁਨੀਲ ਗੋਰਖਪੁਰ ਤੋਂ ਹਥਿਆਰ ਲੈ ਕੇ ਆਉਂਦੇ ਸਨ। ਪੁਲਿਸ ਇਹ ਪਤਾ ਲਗਾਉਣ 'ਚ ਲੱਗੀ ਹੋਈ ਹੈ ਕਿ ਬਦਮਾਸ਼ਾਂ ਨਾਲ ਹੋਰ ਕਿੰਨੇ ਲੋਕ ਸ਼ਾਮਲ ਹਨ। ਫਿਲਹਾਲ ਵਿੱਕੀ, ਖੰਨਾ ਅਤੇ ਹੁਸ਼ਿਆਰ ਖਿਲਾਫ ਕੇਸ ਦਰਜ ਹਨ।ਸੁਖਦੇਵ ਮੂਲ ਰੂਪ ਵਿੱਚ ਪਾਤੜਾਂ ਦਾ ਰਹਿਣ ਵਾਲਾ ਸੀ। ਅਪਰਾਧੀ ਵਿਰੁੱਧ ਗੰਭੀਰ ਧਾਰਾਵਾਂ ਤਹਿਤ ਕੁੱਲ 25 ਤੋਂ 28 ਕੇਸ ਪੈਂਡਿੰਗ ਹਨ। ਉਸਦੀ ਪਤਨੀ ਪਾਤੜਾਂ ਵਿੱਚ ਉਸ ਤੋਂ ਵੱਖ ਰਹਿੰਦੀ ਹੈ। ਪਰਿਵਾਰ ਵੱਲੋਂ ਵੀ ਉਸ ਨੂੰ ਬੇਦਖਲ ਕੀਤਾ ਹੋਇਆ ਸੀ। ਵਿੱਕੀ 2006 ਤੋਂ ਅਪਰਾਧ ਦੀ ਦੁਨੀਆ 'ਚ ਸ਼ਾਮਿਲ ਹੋਇਆ ਸੀ। ਉਸ ਦੇ ਪਰਿਵਾਰ ਦੇ ਕਈ ਮੈਂਬਰਾਂ ਉੱਤੇ ਵੀ ਅਪਰਾਧਿਕ ਮਾਮਲੇ ਦਰਜ ਹਨ। ਵਿੱਕੀ ਦੇ ਦੋ ਬੱਚੇ ਵੀ ਹਨ। ਅਪਰਾਧੀਆਂ ਦਾ ਇਹ ਗਰੋਹ ਮਾਛੀਵਾੜਾ ਤੋਂ ਹੀ ਚੱਲ ਰਿਹਾ ਸੀ। ਨਸ਼ੇ ਦੀ ਪੂਰਤੀ ਲਈ ਹਰ ਰੋਜ਼ ਰਾਤ ਸਮੇਂ ਵੱਖ-ਵੱਖ ਬਾਈਕ 'ਤੇ ਸਵਾਰ ਹੋ ਕੇ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦਿੰਦੇ ਸਨ। ਹੁਣ ਤੱਕ ਇਹ ਗੱਲ ਸਾਹਮਣੇ ਆਈ ਹੈ ਕਿ ਸੁਖਦੇਵ ਸਿੰਘ ਆਪਣੇ ਸਾਥੀਆਂ ਨਾਲ ਮਿਲ ਕੇ ਬੰਦੂਕ ਦੀ ਨੋਕ 'ਤੇ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਕਰਦਾ ਰਿਹਾ ਹੈ।

ਸੂਤਰਾਂ ਅਨੁਸਾਰ ਦੋ ਦਿਨ ਪਹਿਲਾਂ ਪੁਲਿਸ ਨੂੰ ਗੁਪਤ ਸੂਚਨਾ ਮਿਲੀ ਸੀ ਕਿ ਸੁਨੀਲ ਅਤੇ ਆਦਿਤਿਆ ਲੁਧਿਆਣਾ ਦੇ ਬੱਸ ਸਟੈਂਡ ਸਥਿਤ ਇੱਕ ਹੋਟਲ ਵਿੱਚ ਠਹਿਰੇ ਹੋਏ ਹਨ। ਪੁਲਿਸ ਨੇ ਛਾਪਾ ਮਾਰ ਕੇ ਦੋਵੇਂ ਬਦਮਾਸ਼ਾਂ ਨੂੰ ਕਾਬੂ ਕਰ ਲਿਆ। ਸਖ਼ਤੀ ਨਾਲ ਪੁੱਛਗਿੱਛ ਕਰਨ 'ਤੇ ਬਦਮਾਸ਼ਾਂ ਨੇ ਤੀਜੇ ਸਾਥੀ ਦਾ ਨਾਂਅ ਬਲਵਿੰਦਰ ਉਰਫ਼ ਬੌਬੀ ਦੱਸਿਆ, ਜਿਸ ਨੂੰ ਪੁਲਿਸ ਨੇ ਬੀਤੀ ਰਾਤ ਪਿੰਡ ਮਾਛੀਵਾੜਾ ਤੋਂ ਕਾਬੂ ਕੀਤਾ ਸੀ |ਪੁਲਿਸ ਨੇ ਤਿੰਨਾਂ ਬਦਮਾਸ਼ਾਂ ਦੇ ਬਿਆਨਾਂ ਦੀ ਜਾਂਚ ਕੀਤੀ ਤਾਂ ਪਤਾ ਲੱਗਾ ਕਿ ਤਿੰਨਾਂ ਦਾ ਮਾਸਟਰ ਮਾਈਂਡ ਸੁਖਦੇਵ ਵਿੱਕੀ ਹੈ। ਪੁਲਿਸ ਨੇ ਵਿੱਕੀ ਦੇ ਮੋਬਾਈਲ ਨੰਬਰ ਦੀ ਲੋਕੇਸ਼ਨ ਸ਼ਹਿਰ ਤੋਂ ਬਾਹਰ ਹੋਣ ਦਾ ਪਤਾ ਲਗਾਇਆ। ਜਦੋਂ ਪੁਲਿਸ ਨੇ ਜਾਲ ਵਿਛਾਇਆ ਤਾਂ ਪੁਲਿਸ ਨੇ ਵਿੱਕੀ ਨੂੰ ਇੱਕ ਬੱਸ ਵਿੱਚ ਵਾਪਸ ਮਾਛੀਵਾੜਾ ਆਉਂਦੇ ਦੇਖਿਆ। ਉਸੇ ਬੱਸ ਵਿੱਚ ਉਸ ਦੇ ਨਾਲ ਇੱਕ ਪੁਲਿਸ ਮੁਲਾਜ਼ਮ ਵੀ ਬੈਠਾ ਸੀ। ਉਹ ਬੱਸ ਸਟੈਂਡ ਤੋਂ ਫ਼ਰਾਰ ਹੋ ਗਿਆ ਸੀ ਅਤੇ ਪੁਲਿਸ ਦੀ ਨਜ਼ਰ ਤੋਂ ਬਚ ਕੇ ਫਰਾਰ ਹੋ ਗਿਆ ਸੀ। ਵਿੱਕੀ ਦਾ ਪਤਾ ਲੱਗਣ ਤੋਂ ਬਾਅਦ ਪੁਲਿਸ ਨੇ ਉਸ ਦੀ ਭਾਲ ਸ਼ੁਰੂ ਕੀਤੀ ਪਰ ਉਹ ਘਰੋਂ ਨਹੀਂ ਮਿਲਿਆ। ਆਖਿਰਕਾਰ ਜਦੋਂ ਉਹ ਵਾਰਦਾਤ ਨੂੰ ਅੰਜਾਮ ਦੇਣ ਲਈ ਸ਼ਾਮ ਨੂੰ ਇਲਾਕੇ ਤੋਂ ਬਾਹਰ ਆਇਆ ਤਾਂ ਪੁਲਿਸ ਨੇ ਉਸ ਨੂੰ ਐਨਕਾਊਂਟਰ ਵਿੱਚ ਮਾਰ ਦਿੱਤਾ।